Le plus vieux document concernant Marquette?

Publié le 16 octobre 2011 par Adam de Beaudegnies

Sentence de la cour féodale de Douai, rendue après une enquête et terminant un procès entre le chapitre de Saint-Croix de Cambrai et Adam de Beaudegnies (seigneur de Marquette), au sujet de leurs juridictions respectives à Marquette – 1273 (vieux style), 10 mars

Sacent tout cil ki sont et ki auenir sont, ke debas fu entre les signeurs de Sainte Crois de Cambray, d'une part et Adan de Biaudignies, dautre part, dendroit ostes et tenans ke li signeur de Sainte Crois deuant nomet ont à Markete, sour les ques ostes et tenans Adans de Biaudignies disoit kil i auoit le signerie et le justice et li signeur le debatoient. Sour co, li signeur deuant dit et Adans de Biaudignies, deuant només, sen misent en mise sour nobles homes : mon signeur Wion de Montigni, mon signeur Jehan de Hamiel (1) et sour le baillius de Douay. Et deuoient li miseur deuant dit enquere coui drois cestoit et lenquisent bien et loiaument et furent li tiesmoignage mis en escrit et li enqueste saelé dou saiel mon signeur Jean de Hamiel et fu li enqueste ouierte pardeuant les homes me dame, en le court à Douay. Et dist Robiers d'Astices, baillius de Douay à ce tans, par le consel des homes me dame ki lenqueste auoient oit lire pardeuant aus, ke Adans nauoit nulle justice ne nulle signerie sour les ostes ne sour le tenement les signeurs de Sainte Crois et ke Adans en laissast goir pasiulement les signeurs deuant dis.

A ce dit dire, furent home me dame : me sire Gilles de Biaudignies, Oliviers Petit Dieus, Tiebaus de Le Vincourt, ki fu baillius de Douay et de Lille, Bauduins de Douay, sierjans me dame, li maires de Coustices, Mikieus dou Rius, Jehan dou Ais, Belins Pietdargent, Bauduin de Roucourt, Bouriaus de Vesignon, Jakemes de Markete, Jehans de Raisse, Gilles de Ruesne, Watiers Pilate de Remi et Willaumes do Mes. Tout chist deuant nomet sont home de fief me dame le contesse de Flandres et de Hainaut. Et sapielerent chist home deuant nomet et li miseur, à leur consel, mon signeur Nich. De Lalaig, ceualier et mon signeur Grart de Wasnes, ceualier. Et fu procureres les signeurs de Sainte Crois deuant dis me sire Jehan Li Panetier, can. (2) de Sainte Crois.

Et pour co ke ce soit ferme cose et estaule, jou Wis, ceualiers, sires de Montigni, jou Jehans, ceualiers, sires de Hamiel et jou Robiers d'Astices, baillius de Douay, auons ces presentes lettres saelées de nos saiaus.

Ce fu fait en lan del Incarnation Nostre Signeur mil cclxxiii, el mois de marc, le dieus apries le Saint Grigore.